Nánar um kæruheimild til úrskurðarnefndar

Úrskurðarnefnd um upplýsingamál leysir aðeins úr ágreiningi um úrlausn máls á grundvelli upplýsingalaga. Sé réttilega leyst úr máli á öðrum lagagrundvelli verður slík úrlausn ekki borin undir nefndina.

Kæruheimild til nefndarinnar er skv. 14. gr. upplýsingalaga nr. 50/1996 bundin því skilyrði að ágreiningur sé uppi um annað tveggja:

• skyldu stjórnvalds til þess að veita aðgang að gögnum á grundvelli upplýsingalaga, eða
• skyldu stjórnvalds til að láta í té ljósrit af skjali eða afrit annars konar gagni, sem fallist hefur verið á að veita aðgang að.

Á grundvelli 4. mgr. 9. gr. stjórnsýslulaga nr. 37/1993 verður óhæfilegur dráttur á afgreiðslu beiðni um aðgang að gögnum á grundvelli upplýsingalaga jafnframt kærður til nefndarinnar.

Sá einn sem synjað er um aðgang getur verið aðili að kærumáli til úrskurðarnefndar um upplýsingamál. Samkvæmt 1. mgr. 16. gr. upplýsingalaga skal kæra til nefndarinnar vera skrifleg og fram komin innan 30 daga frá því að aðila barst tilkynning um synjun stjórnvalds. Rétt er að eftirtaldar upplýsingar komi frami í kæru:

• Nafn kæranda og póstfang
• Tilgreining á hinni kærðu ákvörðun og því stjórnvaldi sem hana tók.
• Upplýsingar um hvenær kæranda var birt hin kærða ákvörðun.
• Kröfur kæranda og af hvaða ástæðu hann telur hina kærðu ákvörðun ranga að efni til.

Æskilegt er að kæru fylgi öll þau gögn, sem til þess eru fallin að varpa ljósi á málavexti, s.s.:

• Ljósrit af beiðni um upplýsingar, hafi hún verið skrifleg.
• Ljósrit af hinni kærðu ákvörðun, hafi tilkynning um hana verið birt skriflega.

Samkvæmt 13. gr. upplýsingalaga er stjórnvaldi skylt að tilkynna skriflega um synjun um aðgang að gögnum eða um ljósrit eða afrit af þeim, hafi beiðni um það verið borin fram með þeim hætti.